ݜݨیا بیاک

انُہ بیاک ݜݨیاٗ چولیْئ اتھلارےْ کار ہن

انُہ بیاک ݜݨیاٗ چولیْئ اتھلارےْ کار ہن

مرثیہ امام (حسین علیہ السلام) خطاب بہ قاتل پلید (لعنةﷲ)


پوں کِݜ:پیر غلام النصیر چلاسی


بَل بُلو شُویں شرِہ گرگر تھے ترس نہ اڑا
وو بے تمیز کوسے گہ آنئ زیلئ ظلم نہ تھوۡبا

کیےۡ ناحق اڇھوݨوۡ تھا علیؑ گہ فاطمہؑ ئ جگر
لیلےۡ مجا چپ بلو سنئ اسے نازبین پسر
قبر دَہ غمجن بلو محمدؐ خیرالبشر 
وو بے عقل قتل اہل بیتوؑ کیےۡ بہتر پشا
وو بے تمیز کوسے گہ آنئ زیلئ ظلم نہ تھوۡبا

تھئ سو کھچو ݜک کدا تھے آ ݜکڑے کپ بلو
ڈا دیک نبیؐ سے تھئ اڇھیو مُڇھو رَپ رپ بلو
ترس اڑےٓ شیطان گہ آ دِشےۡ جو اُڇِیٓ چپ بلو
داغک امتئ ہیو جہ تا بہ قیامت ݜَیا
وو بے تمیز کوسے گہ آنئ زیلئ ظلم نہ تھوۡبا

اٰلوۡ تُہ وو شمر آنئ ارادہ گِیٓ میدانیڑےۡ
نےٓ پُھٹلِہ تجہ موۡ حیران ہنوس،آسمانیڑےۡ
نےٓ اڇھتو آدےۡ،تعجب ہنی نیرانیڑے
آنئ گیٓ صفا لیٓل بِلِہ،لآ زیات ہنو صبر خدا
وو بے تمیز کوسے گہ آنئ زیلئ ظلم نہ تھوۡبا

اہل مرسلانو ڇکیا کوٓئ زیلئ رم شم بلے
آنئ مِݜےۡ جک گیےۡ بش آ جگو جو ادا غم بلے
یاد اڑےۡ آ وخ مئ غریب دِل دہ،لَوۡمےۡ لُم بلے
یاد اڑےۡ آ وخ اش چلاسی ہنو بے حد خفا
وو بے تمیز کوسے گہ آنئ زیلئ ظلم نہ تھوۡبا

مشکل الفاظ:بل بلو حملہ کرنے والا۔رپ رپ بلو آنکھوں کے سامنے کوئی چیز آئے جس کی وجہ سے غصہ آتا ہے۔ لومے لم بلے شلعہ نکلے ۔ رمشم بلو پریشان ہوا۔ریاک کتاب۔

ریاک:زادِ سفر